KISHA E PARË NË BOTË KUSHTUAR SHËN NËNËS TEREZES(Për ta parë videon, klikoni në tekstin më sipër ⬆️)
Një vështrim në historinë e kishës në Dugajevë, komuna e Klinës, Republika e Kosovës
Historia e Ndërtimit të Kishës në Dugajeva:
Dugajeva është një fshat i komunës së Klinës në Republikën e Kosovës, një fshat i vogël dhe i rrafshor i rrethuar me kodra mali, me rreth 100 shtëpi. Ky fshat ka kaluar shumë periudha të vështira dhe të ndryshme historike, veçanërisht gjatë luftës së fundit në Kosovë:
Pas përfundimit të një lufte të tmerrshme dhe të përgjakshme, banorët e Dugajeves ishin të vetëdijshëm se vetëm Zoti mund të kishte bërë një mrekulli të tillë për t’i shpëtuar nga zhdukja kolektive nën një regjimi gjenocidial. Ata, në shenjë mirënjohjeje për këtë mrekulli, shprehën dëshirën për të ngritur një tempull kishtar në shenjë falënderimi për Zotin.
Me ardhjen e Dr. Dom Gjergj Gjergjit si famullitar në famullinë e Gllaviçicës, kjo dëshirë u bë realitet. Kisha filloi të ndërtohej në vendin pranë varrezave të fshatit, me ndihmën e bashkatdhetarëve të fshatit në diasporë dhe kontributin e banorëve të fshatit, gjithashtu me ndihmën e palodhshme të Dr. Dom Gjergj Gjergjit.
Që në fillim të kësaj iniciative, banorët shprehën dëshirën që kisha të ndërtohej në nder dhe lavdim të Nënës Terezë. Ky dëshirë u realizua me rastin e lumturimit të saj nga Papa Gjon Pali II në Romë më 19 tetor 2003. Kjo e bëri të mundur që kisha të merrte emrin zyrtar “Shën Nënë Tereza.” Më 13 nëntor 2003, u celebrua një meshë falënderimi për lumturimin e Nënës Terezë, me pjesëmarrjen e shumë priftërinjve dhe mysafirëve të tjerë.
Mesha e parë u mbajt më 2 shkurt 2001, dhe kambanat, të cilat ishin dhuratë nga Italia, u shuguruan më 1 shkurt 2002. Rrahjen e parë të këtyre kambanave e bëri Izabella Kastrioti, pasardhëse e familjes së Gjergj Kastriotit (Skënderbeut), e cila jeton dhe vepron në Itali.
Kisha ka tërhequr shumë vizitorë, përfshirë mysafirë ndërkombëtarë, si zëvendës-komandantin e KFOR-it, Gjeneralin Bergman, disa priftërinj të KFOR-it dhe shumë anëtarë të KFOR-it.
Në këtë kishë ndodhen shumë relikvije, të dhuruara personalisht nga Nënë Tereza dhe Papa Gjon Pali II. Mes tyre është një qiri që Papa e solli në Shqipëri gjatë vizitës së tij pas rënies së komunizmit, si dhe një petkë që ka gjak të Nënës Terezë, dhuruar nga motrat e Nënës Terezë, pas tentativës për t’i dhënë infuzion në momentet e fundit të jetës së saj. Kjo relikvë ka filluar të zgjojë kuriozitetin e vizitorëve.
Në kërkesë të banorëve të fshatit, tani është vendosur që 5 shtatori, dita e kalimit të Nënës Terezë në amshim, të kremtohet si Dita e Familjes. Për këtë arsye, ata kanë vendosur të heqin festat e mëparshme. Banorët e Dugajevasit i kanë dhuruar kësaj kishe një truall prej më shumë se një hektari. Megjithatë, për shkak të mungesës së mjeteve financiare dhe materialeve të dobëta të përdorura për ndërtimin e kishës, ajo tani është në gjendje të rëndë dhe ka një rrezik të madh për shembje. Prandaj, fshati ka vendosur të ndërtojë një kishë të re, të denjë për Nënën Terezë. Për realizimin e këtij projekti të ri, nevojiten ndihmat dhe angazhimi i të gjithë njerëzve vullnetmir që janë të gatshëm të kontribojnë.
Karakteristikat e veçanta të Kishës Sonë
Dizajni Arkitektonik: Kisha jonë është një shembull i jashtëzakonshëm arkitektonik, i cili bashkon në mënyrë harmonike elementët tradicionalë dhe modernë. Dizajni pasqyron identitetin kulturor të komunitetit dhe krijon një vend mikpritës për mbledhje dhe besim.
Relikvijet Fetare: Në kishën tonë ndodhen relikvije të rëndësishme, të dhuruara nga Nënë Tereza dhe Papa Gjon Pali II. Këto objekte të çmuara, përfshirë një qiri dhe një copë pëlhurë me gjakun e Nënës Terezë, tërheqin besimtarë dhe vizitorë nga e gjithë bota.
Angazhimi për Komunitetin: Kisha jonë nuk shërben vetëm si vend lutjeje, por edhe si qendër për aktivitete të komunitetit. Këtu organizohen ngjarje të rregullta, shërbesa fetare dhe festa kulturore që forcojnë ndjenjën e bashkësisë dhe nxisin shkëmbimin ndërmjet anëtarëve të komunitetit.
Ndihma dhe Mbështetje për Ata që Kanë Nevojë: Kisha angazhohet aktivisht në punët sociale dhe ofron mbështetje për familjet dhe individët në nevojë brenda komunitetit dhe më gjerë.
Festimi i Ditës Shenjtë të Nënës Terezë: Në nder të Shen Nënës Terezë, çdo vit, më 5 shtator, ditën e kalimit të saj në amshim, kremtohet një ditë e veçantë për familjet e këtij fshati. Kjo traditë bashkon komunitetin, si dhe të afërmit, miqtë dhe dashamirët nga të gjitha anët, për të nderuar jetën dhe trashëgiminë e saj.
Programet e Larmishme: Ne ofrojmë programe për njerëz të çdo moshe, me qëllim që besimtarët të pasurohen në çdo aspekt shpirtëror të jetës së tyre.
Vizitorë Ndërkombëtarë: Kisha jonë është një vend i shkëmbimit ndërkulturor. Ne presim miq nga shtete dhe kultura të ndryshme, të cilët marrin pjesë në shërbimet dhe ngjarjet tona dhe duan të përjetojnë mesazhin e dashurisë dhe paqes që na mëson Shën Nënë Tereza.
Një Vend i Rrënjëve të Krishtera: Kisha jonë është një vend i rrënjëve dhe besimit të krishterë për shumë njerëz në Kosovë. Këtu ata që dëshirojnë të kthehen tek rrënjët e tyre krishtere gjejnë mbështetje dhe frymëzim në jetën e tyre shpirtërore. Kisha luan një rol kyç në ruajtjen dhe promovimin e këtyre vlerave.